لماذا أريد ان اتزوج

حاولت مرار و تكرار...ان اصارح نفسى لماذا اريد ان اتزوج...و لماذا دائما ابى يقول لى انتى دونا عن اخواتك...اخرجى هذا الفكر من راسك.. حاولت ان اعرف لماذا يحاول ابى اخراج هذه الرغبه من قلبى...لست اعرف..و ايضا لم اعرف ان اصف ابدا عندما امسك الورقه و القلم...لم اعرف كيف اصف شعورى تجاه الزواج او لماذا اريد ان اتزوج.. ممكن اتكلم بالعاميه عشان اعرف اعبر..


1_احتواء...و اعنيها...بكل ما تحمل من معانى معنويه و حسيه....يعنى لما حد يحتوينى و انا خايفه ... او لما حد احس انى باحتمى فى حضنه.. او لما باحتاج الحنان... دايما باشبهها فى عقل بالى...بقطه صغيوره لما تكون بتدور فى كل مكان عن حاجه هى مش لاقياها بس حاسه انها محتاجاها جدا...و جيت انت ...و ما ادتيهاش الى هى عايزاه...بس خليتها تنسى الحاجه دى لما نامت فى حضنك..و هى صغويره كده..و تقوقعت على نفسها كده...و نامت.
مش عارفة ليه باحسه الاحساس ده.

2- الاستقرار...تعرفوا لما الدنيا تكون بتشتى...اوى...و انت لابس لبس خفيف...و مش معاك شمسيه..و كمان الدنيا ليل..و انت خايف...و تدور على اى مكان تتدارى فيه..و عمال تروح يمين و شمال و تجرى..و قلبك من جوا بيدق اوى...و بالك مشغول جدا....و فجأه تلاقى بيت دافى جميل
و هدوم ناشفه...و سرير رائع...و كل ده بتاعك..و هيفضل بتاعك خلاص..و بقيت خلى البال..و مش خايف..و مبتسم كده و انت مغمض عنيك و مستلقى على السرير..هو ده الاستقرار عندى.
و لكن برضو فعلا..ما حدش هيحس بمعنى الاسقرار و بالذات النفسى و الى يندرج تحته العاطفى...الا لما يتزوج.

3-المشاركه الوجدانيه... ان يبقى عندى حد بحبه اوى...يهمنى امره...دايما مشغوله عليه...معاه بقلبى قبل ما اكون بجسدى...يجى من الشغل تعبان ...مهموم...يلاقى الى يخفف عنه...يسمعه ...و يرمى همومه و احزانه فى حضنه..يشيل عنه...و لما يبقى فرحان...يلاقى فراشه رايحه جايه فى البيت...بتغنى...بتبتسمله...الفرحه مش بتساعها لما تلاقيه فرحان..
و هى كمان...يوم ما تكون زعلانه...بتعيط...تلاقى الى يمسح دمعتها بيد حنينه..و يهديها بكلمه حلوه تنسيها همومها... يحسسها انو معاها لو الدنيا كلها سابتها..

هى دى النقطه الرابعه

4_ الامان... انى اعرف انى مع الانسان الى انا اخترته...مافيش حاجه تخوفنى..طلاما هو جمبى.. الخوف المادى بتاعنا..الى لما باخاف من الصرصور..و لا الفار...اه موجود...و لكن لما هو بيكون جمبى و يحسسنى انو "ما تخافيش و انا معاكى..فداكى روحى" فعلا ساعتها تحسى ان انتى فى امان و تنامى قريره العين.

5-الالفه...عارفين يعنى ايه إلف؟؟ او ليه بنقول قطط اليفه...لانك من كتر ما عرفتها و عاشرتها و حبيتها..خلاص بقيت تحس ان انت و هى واحد...ما باقتش حد غريب عنك...هى و هو كمان...الفوا روح بعض...عرفوا بعض اوى و حبوا بعض اوى لدرجه انهم خلاص ما عدش حد فيهم يعرف يعيش من غير التانى..حسوا ان هما فعلا ربنا خلق فلانه مامت فلان و فلانه مامت فلانه عشان سبحان الله يجيبوا الود دا و البنت دى ...الى يبحان الله جمعهم القدر مع ان كل واحد فيهم كان مولود فى بلد غير البلد...عشان فى الاخر...مكتوب عند ربنا...ان ده...لدى...و دى...لده...عشان هنا تؤأم روح بعض..

6_ بيت صح بجد...مسلم بجد...لا اخوانى و لا سلفى...مسلم الاول...قبل اى حاجه...بيت ما تهزهوش المصايب و لا تاثر فيه المشكلات..بيت يشار اليه بالبنان...هو ده البيت الاسلامى..
صلاه فى اوقاتها بتتصلى...غض البصر بيتطبق صح...تقوى الله فعلا...الفجر سوا...كل البيت..الزوج و الزوجه و الاولاد..و بعدها الاذكار مع بعض...جلسه يوميه جميله بعد المغرب...فيها الروحانيات تزداد..و الترابط الاسرى معاها تقوى..تفوق فى كل مجالات الحياه..اخلاق..دراسه...فنون..هوايات..رياضه..
كله..كله. بيت كامل متكامل من كل حاجه..

8-الامومه...دى لوحدها حاجه مهما اتكتب فيها مش هيكفى...الاحساس ان النونو ده بتاعك..انتى الى جبتيه...من دمك و من لحمك...حته من قلبك...احساس رائع..مش ممكن تعرف توصفه ولا حتى الى جربته...لانو فوق مستوى الوصف..
و لكن اكيد لما الحاجه تكون بتاعتى انا.. هاكون باحبها...و اكون باحبها..اكيد هاحب تكون احلى حاجه فى الدنيا...و هاحافظ عليها بنن عيونى...و لا عمرى يهدالى بال لو شفت فى عيونهم دمعه...و خصوصا لو كنت انا السبب فيها.
الامومه دى احساس رائع..


7-العفه... مش محتاجه اتكلم فيها..كل الناس عارفه ان دى سبب مهم جدا...وليدة الحب..و بيها بيقوى الحب اكتر و اكتر...بس ما تكونش هى الاساس...يعنى ما تكونش هى هدفى...و اول ما يتقال "زواج" يجى فى بالنا المعنى ده...العلاقه دى نهايه مطاف الحب...كقيمه...و هى دافع الاستمرار....مش فى الحياه...لا...فى الحب..


طولت عليكوا اوى...دا ما يجيش واحد على الف من الى جوايا..و لكن الى قدرت اعبر عنه بس..هو الى اتكتب فوق.. و كمان دى مش مثاليه...نقدر...بجد نقدر نخلى بيوتنا دى جنه فى الارض... و سكن و موده و رحمه و سعاده..و كل المعانى الجميله.. و لكن.. ما هما كان...فى مشاكل...و فى سحاب هيعلى....بس لو احنا اقوى...لو احنا بنحب بعض...هيعدى...و هنقول سحابه....و عدت...و هنقوم و نفض هدوما...و نمسك فى ايد بعض..و نكمل المشوار.. و نيجى يوم القيامه...بدل ما كل واحد مننا يفر من التانى...نيجى احنا مساكين فى ايد بعض...مش خايفين..لاننا فى الدنيا...كان هدفنا من كل ده....ربنا...بيت مسلم صح...يكون لبنه فى جدار الامه الى بتنهار...لعلنا بقابل بيه ربنا...و يكون معذرة لينا عنده و عند نبينا محمد

مع تمنياتى للجميع بقفص زوجية سعيد .. قصدى بعش زوجية سعيد


تعليق جريدة المصرى اليوم على الموضوع